اشعار ترکی ابوالفضل کریمی(آتا به ی )

 

            آند اولسون  

                  *******

آند اولسون تؤکولن یئرسیز قانلارا  

ظلم ایله سووشان بو زمانلارا.   

 

« بابک» قالاسیندا دایانارام من  

قویماران ظلم اولسون بو طفلانلارا.  

 

دیلیم کسیلسه ده، جانیم گئتسه ده  

یاشاسین دئیه رم تورك اوغلانلارا!  

  

ستارخان - باقرخان سرداریمیزدیر  

جانیم   قربان   بئله   قهرمانلارا!  

 

ایران وطنیم دیر، « الخلج» کندیم  

شهرتی یول چکیب آسمانلارا.  

 

« آتا به يَم»، آذربایجان اوغلویام  

سؤزلریم یازیلاجاق دیوانلارا.

*******

#Atabəy         95/4/10

#شاعر 

#ابوالفضل_کریمی( آتا به ی  )

                     بایرام  

                       *****

گئچیریلدی گونلر ،هفته لر،  آیلار

غم  کدرله  باشا   چاتدی  ایلیمیز

اؤلکمیزده  قوْزاندی  های هارایلار

باتان گونش گیبی  باتدی  ایلیمیز

 

سئل دن زلزله دن باش آچمادیق کی

هر آتدیم آتدیقجا بیر قادا گؤردوک

اوْدلار ایچره یاندیق هئچ قاچمادیق کی

جهنّمی  ده ، بو   دونیادا  گؤردوک 

 

دوشدو دیللره یئنه بایرام سَسی

وئریلدی  مژده لر  کی  بهار گلیر

واختی یئتیب دیر سیندراق قفسی

چوْخ زاماندیر حیات بیزه دار گلیر

 

گل بو  آیدا  اوْلاق  سفره لر  دادی

یوْخسول ائوین بو گونلرده گؤزلویَک

چوْخ اوشاغلارین گؤزلری یوْلدادی

اونودولموش  رسمیلری   دوزلویَک

 

بیر اوشاق گؤزونه سورمه لر یاخیر

بیر اوشاق گؤزونون یاشلارین ساغیر

بیر اوشاق قوْلونا بیلرزیک تاخیر

بیر اوشاق چؤره یه حسرتله باخیر

 

بیر آتا غَم  یوکون چکیر چیگنینه

یوْخسوللوق اوْدوندا آلیشیب یانیر

نلر قوْیسون سفره هفت سینینه 

بایرام گونو اوشاغیندان اوتانیر

 

غم غصه دن باشقا یوْخدور بیر یاری

کوسوبدور شنلیکلر باریشا بیلمیر

یوْخسولون اللهی، وارلینین واری

قطره لر دریایا، قاریشا بیلمیر

 

ائل ایچینده توتور اؤزونه اَلَک 

هرآن بو اؤلکه ده خجیل دولانیر

کاسیب اوشاغینا آجیل نه گرَک

باخیر کال آلمایا آغیز سولانیر

 

بایرام یاخالاییب اؤرَک دؤیونور

دوْست دوشمانیم بو حالیمی بیلمه سین

هامینین کئفی ساز، هامی سؤیونور

دئیین بو ایل بایرام بیزه گلمه سین

 

هر زاد ایندی پولدو جانیم وای بیزه

ایندی حالیمیزی سوْروشاندا یوْخ 

بایرام اوْلوبدور قارا گون دای بیزه

ایندی هئچ بیزیمله گؤروشن ده یوْخ

 

گل ایندی باهم اوْتوروب یاس دوتاق

بلکه همدمیمیز   اوْلدو   گؤز   یاشی   

 گل قارداشیم اؤزگه لره تاس دوتاق

بیزه   گلن   حکیملر    اوْلدو   ناشی   

 

لیسانسیلار  پارکیدا  پاخلا  ساتیر

جیبیمیز بوْش گولمه ییمیز هاوادیر

چوْخ اوشاقلار چوْخ گئجه لر آج یاتیر

اهل عیالدان شرمنده ییک داوادیر

 

اؤزوموز آج ، اؤزگه یه تیکه دوتدوق

اؤزگه نین یوکون ده بیز داشیییریق 

ازَل  گوندن  تیکه نی  یئکه  دوتدوق

بیلین   نجور  اؤلکه ده  یاشیییریق

 

خوْشلامارام     آغیزلار      رَزَلَنسین

اورَک     سئوگیم     آذربایجانیمدی

یئنی    ایلده   اورَکلر   ته زه لنسین

اوْنا قوربان اوْلان شیرین  جانیمدی  

 

  داحا  اؤزومو  اوْدلارا   سالمیشام 

استمَم کی حالیز منیم دَک اوْلسون 

" آتا به یَم "  غم - کدر ده  دالمیشام 

هر  حالدا  بایرامیز موبارک اوْلسون.

*****

#Atabəy   

نوروز  بایرامینیز مبارک

#شاعر : ابوالفضل کریمی ( آتا به ی )

          قایتار منی 

              ********

یُورولدوم   بیرداها  بئله  زاماندان

چؤکوب درد کدریم جوشان قانیما

نیسگیللر  سالدیلار    منی آیاقدان

قایتار   منی  اوشاقلیق   دورانیما 

 

عجب زمانه دیر     عجب دنیا دیر

چوخالیب اؤزلرین اوجوز ساتانلار

یُوخسوللاری ایندی گؤر نه اوینا دیر

گون اورتادان سونرا   پولا چاتانلار

 

دونیادا  بو رسم  و  بو عادت ندیر

قالمیشام   دونیانین   قیل و قالینا

هئچ دییَن  یوخدور بو  سیاست ندیر 

یانان  یوخ  بیزلرین   یانان  حالینا 

 

بیز گئدن یوللاردا  قالانیب داشلار

ساغ سولا آشیریق یئریش بیلینمیر

قارداشی ساتیرلار ایندی قارداشلار

کسیبلر   دیللری   دئییش   بیلینمیر

 

اوغلانلار  آتاسین  ،  قیزلار  آناسین

الان  کی  زاماندا   راحات   دانیرلار

اؤزگه دن  آلدیقی   او بیر  داناسین 

 اؤزلرینه   گؤزل   دونیا    سانیرلار

 

"آتا به ی " گؤردویون ایگیدلر هانی

بو سؤزلر داغلارین بیر پاراسی دیر

آچ  گؤزون  بیر داها  دونیانی  تانی 

اویان بیر یوخودان گؤر هاراسی دیر .

*******

96/10/13

#شاعیر : ابوالفضل کریمی ( آتا به ی )

 

       آغلاما گؤزلریم 

         ******

بو سئوگینین سُونو آیریلیق اولدو

هئچ بیر داملاییب دنیزه دولمادی

داها  عمروموزون  باهاری  سولدو

آغلاما  گؤزلریم  قیسمت  اولمادی

 

سن گئدر کن  گونلریم  کدر  اولدو

نه  اولار  گؤزلیم   قایید  بیر داها

سنسیز بو حایاتیم لاپ هدر اولدو

قایید  آند  وئریرم   سنی  آللاها

 

یئنه آلیشمیشام  یئنه  یانمیشام

کیمسه  نه آنلاییر  منیم دردیمی

بیر کؤزودوم یئندین اودلانمیشام

هاچاغ بیله جکسن  منیم قدریمی

 

بیر اُووج ایسته یم بیر قوجاق دیلک

دردلریوه مرحم  یاپارسان منی ؟؟؟ 

اگر بو  سئوگینی  اؤرکدن  سیلک!! 

گلیب توپراق آلتدا تاپار سان منی؟؟

********

#Atabəy 

ابوالفضل کریمی ( آتا به ی )

96/10/15

        یالان سؤزلر 

              *********

گئدمک ایسته ییرسن بهانه سیز گئد

بو یالان  وعده لر  بو   سؤزلر  ندیر؟

پاخیللیق  ائیله  ییب  اینجیتمه منی

یالانلارین  دوزدور!  بَس دوزلر ندیر ؟

 

 گؤتور   اللرینی     منیم     الیمدن 

قالما هئچ یانیمدا گئد راحات  یاشا

بیر زامان دوشمزدیر آدین دیلیمدن

آنجاق بو سئوگینی وئرمه دین باشا

 

باخما گؤزلریمه دوشدون گؤزومدن

دوشن گؤز یاشی دَک آتمیشام سنی

هئچ نه آنلامادین دوغرو سؤزومدن

داحا   اؤزگه لره   قاتمیشام    سنی 

 

بو  آغلار  گؤزلری   سیله جه یَم من

قالارسان سن بوتای، منده او تای دا

یالان    سؤزلریوی    بیله جه یَم من

حسرت قالاجاقسان  آمما   نه فایدا

 

من  گئدرکن   باغدا  گوللرین  سولسا

 کؤنلوندن گئچه نی  منه   توخورسان

بیر  گون  داریخاندا   گؤزلرین دولسا

" آتا به یین "   نغمه لرین   اوخورسان .

*********

شاعیر : ابوالفضل_کریمی ( آتا به ی )

96/10/19

 

 

     " سانچی "  

         *********

 

دورما قلم یاز نیسگیللی سؤزلری

یانیب چوخ آتالار یوْخدور ایزلری

اوشاقلارین یولدا  قالیب  گؤزلری

 

آمان   الله    یئنه    اورَییم    دوْلدو 

سانچی یاندی تامام گوللریم سوْلدو

 

گوللریمی  فلک   یامان   داغیتدی

اَسدی خزان یئلی،  دومان داغیتدی

گومان ائیله مَزدیم ،گومان داغیتدی

 

یئنه ده   آنالار   ساچلارین    یوْلدو

سانچی یاندی تامام گوللریم سوْلدو

 

چوخ   آتالار   دَییشدی  دونیاسینی

بالاجا   قیزلاری   دوتوب    یاسینی

اوْخویورلار    الرَّحمَن    و  یاسینی

 

سویون آراسیندا جانلار کول اوْلدو 

سانچی یاندی تامام گوللریم سوْلدو

 

هاچاغا دَک  آنا   دؤیسون    باشینا؟

کیم  وئره جَک   خبرین    قارداشینا؟ 

نئجه دؤزسون اوشاغین گؤز یاشینا؟

 

بو گون آتا،  هم یاندی  هم بوْغولدو

سانچی یاندی تامام گوللریم سوْلدو 

 

دنیزده   یاناندا   نه   چکدین   آتا 

اولمادی  بیر  کسین  امداده  چاتا

دور  قوْیما  وطنین   پرچمی  یاتا

 

جانین  اَریدی   سوموکلر  اوْغولدو

سانچی یاندی تامام گوللریم سوْلدو

 

دوزدور کی  اؤزوی  اوْدلارا   قاتدین

آنجاق بو دونیاوی چوخ باها ساتدین

چون کی وطنیمین باشین اوجالتدین

 

بو گون  " آتا به ی" یئنیدن دوْغولدو

سانچی یاندی تامام گوللریم سوْلدو .

 

******      

# شاعیر : ابوالفضل کریمی ( آتا به ی )

#Atabəy    وطنیم تسلیت 

 

     بیر دؤلت ایکی میلت  

                    **********

 نییه توفانلی دنیزلر بو گئجه قان دیله ییر؟  

قارا باسمیش شهرین هرکوچه سی جان دیله ییر  

بوردا باش ساخلاماغین قئیدي قوچ اوغلان دیله ییر  

بو قارانلیقلارا حیرت هامی، آواره قالیب  

بیرجه دولت، ایکی ملت هامی آواره قالیب.  

  

بورا اودلار ائلی دیر، شاعري چوخدور گؤزه لیم  

مدنیت یوکودور، بیلگییه توخدور گؤزه لیم  

شعري هم فولکلورو گؤزلره اوخدور گؤزه لیم  

داغیلیب دیر اولو نعمت، هامی آواره قالیب  

بیرجه دولت، ایکی ملت هامی آواره قالیب.  

  

بئله حکمت نه اولور، ملتی آجدیر گؤزه لیم؟  

یئتیمین گؤز یاشی او باشداکی تاجدیر گؤزه لیم  

دیلی اودلاردا قیزارمیش قارا ساجدیر گؤزه لیم  

دارالیب دیر بو حکومت، هامی آواره قالیب  

بیرجه دولت، ایکی ملت هامی آواره قالیب.  

  

دانیشان دیللري کسدي قودوران قانلی گئجه  

آچیلان اَللري کسدي داغی توفانلی گئجه

سحرین جانینی آلدي یوزه دوخسانلی گئجه  

نفس آلماق داحا زحمت، هامی آواره قالیب  

بیرجه دولت، ایکی ملت هامی آواره قالیب.  

  

نه گناه اوستده دؤیورلر، نه گناه ائیله میشیک؟  

بیز کیمین بیر قوشونا گلمه، قاییت، سؤیله میشیک؟  

یا کیمی حقین آلیب گوجله بالا بیز یئمیشیک؟  

وطن اوغروندا چک حسرت، هامی آواره قالیب  

بیرجه دولت، ایکی ملت هامی آواره قالیب.  

  

قوي یازیم سؤن سؤزومو، کؤزمه لریم قانه گلیر  

« آتا به ي»، سؤیله نییه میلتیمیز جانه گلیر؟  

یازدیغیم والهی بیر باشداکی وجدانه گلیر  

دوزولوب بوش مدنیت، هامی آواره قالیب  

بیرجه دولت، ایکی ملت هامی آواره قالیب.

 

*********

#شاعیر : ابوالفضل کریمی ( آتا به ی )

      یار حسرتی 

           ********

گل فلک  الدن  گئدیری  نیگاریم

دونور  خزانا  عمرومون  باهاری

اونودوب بیر داحا بی وفا یاریم

ساخلامیشام عکسینی یادیگاری

 

تاپیب اؤزگه سینی منی ترک ائدیب

حالیما گؤیده کی قوشلار آغلاییر

دونیامین وارلیقی الیمدن گئدیب  

 احوالیمی گؤرن  اورَک  داغلاییر

 

یار حسرتی منی شاعیر ائیله ییب

چارپان اوره ییمی قانا دؤندریب

عاشیقلر ایچینده ماهیر ائیله ییب

سؤنموش اوجاقی وولگانا دؤندریب

 

مجنون ائدیب منی سالیب چؤللره

داغلاری   داشلاری  گؤزلریم   گزیر

داستان اوْلوب ایندی دوشوب دیللره

عاشیقلار  سازیندا  سؤزلریم  گزیر

 

دوْلاناجاق   آیلار، ایللر   گئچه جک

یاد اوْلموش ائللرده یادیم  قالاجاق

فلک،" آتا به ی" ین عمرون بیچه جک

بو   یاساق   دیللرده   آدیم   قالاجاق 

 

**********

# شاعیر : ابوالفضل کریمی ( آتا به ی )

#Atabəy            96/11/9

 

 

 

          بَکله عاشکیم 

               ***********

 

نه بیلئیدیم، بیر گون آیریلاجاقسان

نه بیلئیدیم، گؤزوندن سالاجاقسان

نه بیلئیدیم، سن منسیز قالاجاقسان

سن گئده لی شهری گه زه بیلمیرم

ایندی     آیریلیقا    دؤزه   بیلمیرم

 

ائرکن  ائرکن   گؤروشومه   گلرکن

ایلک   باخیشلا   کدریمی   بیلرکن

جیرتدان جیرتدان گؤزلریمه گولرکن

بَکله    منی      بَکله   منی   عزیزیم 

منله اوْلوب ای هر  زامان  من  سیزیم

 

قارا    دَنیزلرده   واحیمه لی   سَس

چالیشماییر  قلبیم گوجسوزدور  نفس

کدرلی    سوکاکدا  سوْغوق بیر قفس 

 سئوگیمیز  گؤنلومدن  اؤجشسیز  گئدیر 

ساده جه    اونودوب     منی ترک  ائدیر

 

سالما   منی   تهلیکه لی   یوللارا 

قوْی  سریلیم  اوْ  آچیلان  قوْللارا 

سارسیلا   منی   ساغلارا  سوْللارا 

گئتدیگین سوکاکدان گئری دؤن جانیم

بو    سَبَبدن    منده    سنی    اینانیم

 

گئجه لر  آتدیم آت  کؤمن لریمده 

مکتوبلار   یازماقا   قلم   الیمده 

"آتا به ی " یَم، آدین هرآن دیلیمده

آردینجا  گزیرم  هئی   یالین یالین

بَکله عاشکیم ،بَکله شعریمین دالین

 

# شاعیر : ابوالفضل کریمی ( آتا به ی)

#Atabəy                    96/11/11

 

            حق سؤز 

         ******

اینجیمه وطن، اینجیمه سؤزومدن

بیر عده لر سالیب  سنی گؤزومدن

 

خالقی، سه فاز، بیزلزی فانوس دوتار

الله  اؤزون  گل بو  ظولمتدن  قورتار

 

گؤزوم گؤرور بیر ایش گلمیر الیمدن

من حاق دئسم سن اینجیمه دیلیمدن

 

ذرجه      الیمده   اولسایدی    ایمکان

ْقوْیمازدیم قوراندان دَم وورا شئیطان

 

گؤرموشم   شئیطانه   آمین    دییه نی

هم  توربادان،   هم   آخوردان   ییه نی

 

بوجور واختدا چوْخو ایماندان   دییَر

ائوینده    اوْلمایان    قورآندان    دییَر 

 

مسجیدلرده        همیشه     خییراوْلار

دالدادا      شیطانیلا     ال     بیر اوْلار

 

یییَر    قارین   دوْلو   حارام   چؤره یین

مسلماندی       قارا    دوتوب    اوره یین 

 

تویلاردا یاسلاردا کی  باش تاجی دیر

البته   که      محترمدیر     حاجی دیر 

 

واجیب  دیر   اوْنلا    آرامی    سازلیام 

دیندیریسن   دئییر    دست    نمازلیام 

 

اوْغلانا   قارداش دیر  قیزلارا    باجی

چوخ ایشلرین ، اوْندان گئچیر آرقاجی؟! 

 

کسمه یه    باشلاری    تیغه    آختاریر

گزیر    خیاواندا     صیغه      آختاریر

 

یارانیبدیر   اوْردا  بوردا   سوله نسین

گرکدیر  کی   باشینا   کول   اله نسین 

 

 بو نه    قارداشلیق نه   مسلمانچیلیق 

 بره بیتیرمز  سوْن کی  پئشمانچیلیق

 

خیاواندا      قوْرخو    باسیر    میللتی

بیرلیگیمیز   یوْخدور ،  اوْدور   عیللتی 

 

هر  آخشاملار کی   وقت   اذان   اوْلور

تلگرامدا     هامی   غزل   خوان   اوْلور

 

نئیلیرم      دانیشدین     پرده    دالیندا 

اورک     یاندیر      وطنه  بو    حالیندا 

 

اوْدو- اوْد    اوستدن    قالاما    مانقالا 

گل  قارداشیم    حرمله نی   سال  یوْلا 

 

نئچه واختدیر اَتسیز اوْلوب شوْربامیز

بازاردان بوُم بوْش   قاییدیر   توْربامیز 

 

صدقه    صاندیغین    دوزدون   مئیدانا 

آژلیق  خسته  لیگی  دوشوب  هر   یانا

 

مگر   نفتیمیز   یوْخ    عرب لره     تای 

میللتین   زحمتین  ائیله مه   یین   زای

 

سن کی جیبله ییرسن پوللاری دوت قات

یُرقانیوی   چک   باشیوا   ییخیل     یات

 

قوردا  قوْیون  تاپشیر ، اوْغرویا  خئیرات 

گون  به  گون  ده   چوْخالیر   بو   نفرات

 

یامان   قاریشیب   ایشلر   باشدان   باشا 

هئچ بیر  باخان  یوْخ گؤزدن  آخان  یاشا

 

دیلیمیز تورکجه دیر اؤلکه میز ایران

دیلیمیز یاساقدیر، اؤلکه میز ویران

 

چوخالیبدیر یوردومون ساتقینلاری

توْکورلر   یئنه ده   ناحاق   قانلاری

 

گؤیدن باشا،داش، سانکی شاباش گلیر

تولکو   گئدیر   یوردوما   اوباش  گلیر 

 

اؤزوموزدن بیزه هئچ  کؤمک  اوْلمور

ایت اَلیندن سوموک گمیرمک اوْلمور

 

هر یولوْن باشیندا بیر  کسیجی  وار 

البت کی هر ائوده بئش بسیجی وار

 

بار   الهی     جانیم     سنه    امانت

اؤزون    ائیله  بو  جانیمی  ضمانت  

 

رحمتلیک  آتام دا  گؤزل  دییَرمیش 

کی آغاجی  ایچیندن قورت ییَرمیش

 

همان او قوردلار بو زامان خاندیلار

خاندان قاباق قورخمالی خوخاندیلار

 

او خوخانلار ایندی لاس وگاس دادیر

موشگولوموز  ایندی  اختلاس دا دیر

 

آچ قولاغو سؤزومو ائشید آی کیشی

باخمیرلار هئچ ارکک دیر بو یا دیشی

 

اونلار   کی   بیزلره   دیندن   دئییرلر

اؤزلریده    حق و    الناسی    یئییرلر

 

خیمیر خیمیر ایندی دوشوبلر  ایشه

مییللتین   حاقینی   چکیرلر   دیشه 

 

بیلمیه   نین    باشینی      آللادیرلار

بییلن  لرین     آیاغین      ناللادیرلار

 

میللت قانین سورماق اولوبدور عادت

هئچ   اوتانیب   چکمیر   ذره  خجالت

 

کئفلندیریب     بیزی     آقا    زاده لر

الیمیزدن         جالانیبلار      باده لر    

 

بیری سوسوز  قوْیوب  بیری  آجیردار

بیریده  مین  میلیارد  پولو   قاچیردار؟؟ 

 

عیبی  یوخ   ایران   وطنیمدیر   منیم

جانیم،  قانیم،   هم ده  تنیمدیر  منیم

 

 منده   داشی    تونله رم     ایسرائیله 

قویمارام    ایرانلی     آجیندان    اؤله

 

 شوکر   الله   وار هله     یارانه    میز 

هر بیر آیا     45 مین        ماهانه میز 

 

یوخسوللوق هئچ کسین بوغازین بیچمز

قارداش کی  قارداشین   قانینی   ایچمز

 

میلیارد ،میلیارد پول قوزاسا رایسیمیز

گرک ده   چیخماسین  بیزیم  سَسیمیز

 

چوخ  پوللار  یئییبدیر   بابک  زنجانی

قاریشمارام   عمه ام  و  خالام   جانی  

 

اصلا  دئمه رم  گتیر  مندن   بؤله ک

فقط  یوْلون  دئسین  بیزلرده  بیلک

 

صبر   ایوب  ایستر  صبیر  داشمیا 

یوخسول آداملار دیواردان آشمیا

 

دریانی    نئیلیرکی     شهر   اورمیه 

اوندان  واجیبدیر   لبنان و   سوریه

 

ایرانلی لار  غیرته   معروفدولار

چوبانلاری یئرینده فیلسوفدولار

 

ذیکریلری     الا  و    بالله  هیدی

افتخاردی هامیسی حزب الله هیدی

 

مسلمان   عربلره     آرخا     دورار

امثال  داعیشین   قولاغین   بورار

 

یاخینلاشیر        22        بهمنی 

گییه جَییک دیزلره دک  چکمه نی

 

تیتره ده جک دونیانی  ایران  آدی

شعاریمیز    مرگ    بر     آمریکادی 

 

چاتدی باشا بوگون بئله حیکایت 

اوزگون اوْلوب مندن ائتمه شیکایت

 

شاعیرم      فقط   انتقاد     ائیلیرم 

یوْخسا   والله    دردسری    نئیلیرم 

 

سؤزلریم چوخ آجیق گلمه سین سیزه

دوشمه سین ایشیمیز بیر بیری میزه 

 

حؤرمتلی   یولداشیم  منی  دانلاما  

پاسگاه ،  سپاهی   دالیمجا  یوْللاما 

 

آختارماقا    گلمز   منیم     مکانیم 

کاسیب  اوشاغیام قوْیون  دوْلانیم 

 

الله  وئرگیسیدیر،  وئریبدیر  منه 

شوخلوق اوچون هر دن شعر یازام سنه

 

قرار  دئیل   همیشه  تعریف  ائدم 

تعریفی ائتمه سم بورانی ترک ائدم 

 

قیشین گونو تندیریزده قوش پیشیر

حق سؤز ائشیدجک اورَگینیز شیشیر؟! 

 

بو  سؤزلری  هرکسه  یاپماق  اولماز

منی   داحا   ایراندا   تاپماق    اولماز

 

الخلج     کندیدن    بولاغ    باشیندا

" آتا به یَم  "    من     25     یاشیندا

 

**********

# شاعیر : ابوالفضل کریمی ( آتا به ی )

               یامانلیق

                 ***********

من همیشه حیرانام.. باخچادا سونبوللره

سنده بیر احسن دنن بورداکی بولبوللره

سوز آدلی باغ بوستانیم گلین باخین گوللره

بوردا باغ بوستان قالیب سیز خانلیق آختاریرسیز؟

یاخشیلیغی ایتیردیز ،یامانلیق آختاریرسیز

 

 

آد قازانیب دونیادا چوخ اوجالیبسیز ایندی

من گورورم ضعیفدن لاپ باج آلیبسیز ایندی

دن ده دوشوب ساچلارا دای قوجالیبسیز ایندی

حسرتیله  آه  چکیب  جاوانلیق  آختاریرسیز

یاخشیلیغی  ایتیردیز  یامانلیق آختاریرسیز

 

 

باشادا سالماغ اولماز چوخ چتیندی او باشی

دوشر اولن فئلینه مظلوم توکر گوز یاشی

ایاغ یالین گزدیرر بو مظلومو داغ داشی

آیاقلار قابار اولوب دابانلیق آختاریرسیز

یاخشیلیغی ایتیردیز،یامانلیق آختاریرسیز

 

 

آیاق‌لاردا تاپدانیر یازیق اؤلکه هر ساهات

قارا زولفو کدردن اولور یئلکه هرساهات !

ائششه‌ییزین یارادیر بئلی بلکه،هر ساهات

ماللا نصرالدین کیمی پالانلیق آختاریرسیز

یاخشیلیغی ایتیردیز یامانلیق آختاریرسیز

 

 

وطن یولو آغیردیر  چتین دونمک بو یولدان 

دوشمان باسیر آدامی ساغیندان هم ده سولدان 

نییه بئله اولموشوق قورخوموز واردیر کولدان 

بیر عومور ایتیرمیسیز بیر آنلیق آختاریرسیز 

یاخشیلیغی ایتیردیز یامانلیق آختاریرسیز

 

 

کورپو  سالیب آرازدان اوتای بوتای گئچمیشم

ال آچما سن گوی لره دویونجا من ایچمیشم

یوز اولچونو قارداشیم بیر دفه لیک بیچمیشم

فاطمیا چیخماز تومان ،تومانلیق آختاریرسیز

یاخشیلیغی  ایتیردیز  یامانلیق  آختاریرسیز

 

 

آراز سالیب آرانی ، کورپو نئیله یر بیزه؟

باکی اروپا اولدو،آجلیق دوشدو تبریزه

اوتای دان آیری دوشدوک غریب اولدوق ائومیزه

ندن گومان ایچینده، گومانلیق اختاریرسیز

یاخشیلیغی ایتیردیز یامانلیق آختاریرسیز

 

تاریخه باش چکرسن من اویغورام اوزبکم

سینه‌سی داغلی ارکم ستارخانام بابکم

یئنیلمز بیر اوردویام سانمایین کی من تکم

ایندی دوروبسوز منه تورانلیق آختاریرسیز

یاخشیلیغی ایتیردیز یامانلیق آختاریرسیز 

 

 

بیلمم هایاندا قالیب بس بیزیم غئیرت‌یمیز

خیانت لر اوْلوبدور دنیزدن قالماییب ایز

یاتیب اویانماییبدیر هله‌ده میللتیمیز

اورمو گولو قورویوب شورانلیق آختاریرسیز!؟

یاخشیلیغی ایتیردیز، یامانلیق آختاریرسیز

 

 

هاچاغ اولوب من سنه سامانلیق آختارمیشام

سؤزده  سنی  سیخماقا  قارانلیق  آختارمیشام

بو اولکه نین  قوردویام  دومانلیق  آختارمیشام

سیزده بو قورد اوستونه جومانلیق آختاریرسیز

یاخشلیغی   ایتیر دیز   یامانلیق  آختاریرسیز

 

 

گاه یازیسان گول چیچک گاه یازیسان تیکاندان

دوغرو سوزو یازگیلان نوش یازیسان یالاندان

سوزلری گاه اویاندان گاه یازیسان بویاندان

اویانداکی سوزلری بویانلیق آختاریرسیز

یاخشیلیغی ایتیردیز یامانلیق آختاریرسیز

 

 

اورکلر ده محبت جوشوب قایناییر داشا

دوست اودورکی دوستلوقون همیشه ورسین باشا

سؤزون حاق دیر"آتا به ی "سنی گؤروم مین یاشا

اؤز اصلیزدن نه گؤزل نیشانلیق آختاریرسیز

یاخشیلیغی ایتیردیز یامانلیق آختاریرسیز

 

************

#شاعیر : ابوالفضل کریمی ( آتا به ی)

          قران و اهل بیت

 

                      *********

 

گؤزل   الله    ائیله   عنایت    منه 

اهل  بیته  عرض   ارادت    ائدیم 

ائیله   عطا     ذره    بلاغت    منه 

محضریندن کسب  رضایت  ائدیم 

 

من  قطره یَم   دریالار  حسرتینده 

ایللردیر کی  اینتظاردا   قالمیشام

قوْیما   قالیم   اؤزگه   شمادتینده 

محبت  عمانیندان   کام   آلمیشام

 

 

اوشاغیکن    منه   اؤیردیب  آنام

124000        دنئیدی     رهبریم

آنامین سؤزودور اولماز کی  دانام

محمد  دیر     خاتم      پئیغمبریم

 

تانرینین  وحیین  جبرأیلدن  آلیب 

تصدیق  نه  لازیم  دونیایا  بللیدیر

بیر گئجه ایچره یئتدی گؤیده قالیب

آدی     قلبیمزده   أن   تصللی  دیر

 

داغلار  اؤریینده   داشلی بیر  سرا

اوْ گونو   پئیغمبره  منزل   اوْلوب

وحی یینه  شاهیدیر  اوْ  غار حرا 

23   ایلده   قورآن  نازیل  اوْلوب

 

ایکی مکاندایدیر بونون دؤره سی

13 ایل مکه ایدی، 10 ایل مدینه

114 دور اونون بیتون  سوره سی

چاتدیریبلار بیزه سینه به سینه 

 

115    دنه    بسم الله  ی   وار 

6000  دن  علاوه دیر  آیه سی

البت کی یئر گؤیون مطلق شاهی وار

سوتونسوز یئرین محکم دیر پایه سی

 

اینانجیم آلله دیر،  کیتابیم  قورآن

سینان دئیل هئچ زامان بو بئیعتیم

 بویولدان چاتسین مقصده  هر اینسان

دینییم اسلام اؤلوب، پاک دیر نییتیم

 

12   اولاراق      واردیر      ایمامیم

تانری     آصلانی دیر     اونون   اولی

بونوعیله        کامیلدیر        ناتمامیم 

حیدر   کراردیر       مرتضی       علی

 

گزیبدیر    قنداغی    عرش    اعلانی

گؤزلرین آچما میش  معشوقه چاتدی

گلمه  ییب دیر   بو   گوهرین   آلانی

عاشورا  دا        کربلانی      یاراتدی

 

اوْخلاندی اوْغلو تؤکدو گؤزدن یاشی

پر پر  اوْلدو  72  ایکی  گولی  یاس

سرلشگری دیر  اوجا  بوْی  قارداشی

غئیرت دریاسی دیر  حضرت  عباس

 

تیغ  جفا   بونلارین  کؤکون   یوْلوب

 هر آن  نیسگیللری   سینه می  ده لر 

11 دنه   گول   باغیمیزدان   سوْلوب

12    اینجی    منجیه     عالم     گلر 

 

کسر ظولمون ریشه سینی دم به دم

محضرینده   قوللوق   ائدر   مسیحا

اوْلار  بیر  داحا   مظلوملارا  هم دم

خادم   اوْلار   اوْنا   حضرت  عیسی

 

حئیران  باخیریق  ساغلارا  سوللارا

هر هفته  جمکران  بیزه صومعه دیر

حسرتله  تیکمیشیک  گؤزو   یوللارا

گلیش گونو سه شنبه یا جومعه دیر

 

هر  نه  قرار   وئرسه   خدای   رحمان 

قبول  ائتمه یه  فرمانین     راضی ییق

گلسه     اگر   مُنجیِ    صاحب    زمان

جان    برکف   مهدینین   سربازی  ییق

 

ناتواندیر     "    آتا به ین   "      قلمی

قطره  کی  دریانی  وصف   ائده بیلمز

اوْلماسا       گر      عنایتی،     کرمی 

قارانلیق   یوْللاری،   یوْخ   گئده   بیلمز.       

 

********

#شاعیر: ابوالفضل کریمی  ( آتا به ی )

 

 

       آذربایجان بالاسی 

       ***************

 

شانلی وطن منیم یوام قوناجیم

وطنین ساغلیقی منیم آماجیم

سئوکی سلطانیام وطندیر تاجیم

دوشمانلارین دردی بلاسیام من

تورکم آذربایجان بالاسیام من

 

بوردا وطن پارچالانیب جوت یئره

هامی یاتیب حاقی گوتور سورت یئره

یوخدور وطن دردین سنین بات یئره

بو یاسلی وطنین خیناسیام من

تورکم آذربایجان بالاسیام من

 

دیلی باغلی ائلین سوزون کیم دئیر

دیلیز اوشاق گوز یاشینی کیم سیلیر

من دمسم اوز سوزومو کیم دیئر

دیلسیزم تاریخین قاراسیام من

تورکم آذربایجان بالاسیام من

 

جانیم جاندان باغلیدیر بو توپراقا

دیلیم یاندان باغلیدیر بو توپراقا

اورک هر آن داغلیدیر بو توپراقا

شامان قوخوسوندا لالاسیام من

تورکم آذر بایجان بالاسیام من

 

ایللر بویو درده قانیق اولموشوق

حاقیمیزدان قالیب یانیق اولموشوق

مینلر سوجا یئرسیز سانیق اولموشوق

اورکلرده اودون داملاسیام من

تورکم آذربایجان بالاسیام من

 

دویوشده کور اوغلو ایگید بابکم

اوزلوگومده اوردویام دئمه تکم

سانمایین حقیمدن بیرآن گئچم

نانکورون عقلین جالاسیام من

تورکم آذربایجان بالاسیام من

 

قیرت ده یوخ تاییم تورک اوغلو تورکم

سانا گلمز ساییم تورک اوغلو تورکم

قوی هر یئرده یاییم تورک اوغلو تورکم

آتا بابکین جان پاراسیام من

تورکم آذربایجان بالاسیام من

 

*******

 شاعر ابوالفضل کریمی ( آتا به ی )

 

 

            شهریار

             ****

قورخوم بودور دونیا بیزه دار گله

غم غوصه لر اوستوموزه هار گله

دونیایه محالدیر شهریار گله

گئدیب ایندی یئری بوشدو شهریار

تامام سرحدلری آشدی شهریار

 

چوخ شاعیرلر قلم آلدی الینه

باجاردیقجا یاناشدی اوز ائلینه

اوستاد اولدپ شعرین فنی فعلینه

قیزیل اوزوکلرده قاشدی شهریار

تامام سرحدلری آشدی شهریار

 

طالع چکدی اونو باخ هاردان هارا

تاپمادی کوچمه دن بیر آیری چارا

آنا دیلی اولدو نیسگیللی یار

فلک ایلن شاببالاشدی شهریار

تامام سرحدلری آشدی شهریار

 

دئیم سیزه نئجه اولدو شهریار

دئییم سیزه نئجه دولدو شهریار

 بیر گول کیمین هر آن سولدو شهریار

 حافظ دن فال آچیب داشدی شهریار

تامام سرحدلری آشدی شهریار

 

حیدر بابا یالنیز قالیب باخ نئجه

بولاقلاری آغلاییر گوندوز گئجه

قلمینده شهریارین باخ گوجه

عجل قاپیا داراشدی شهریار

تامام سرحدلری آشدی شهریار

 

شهریار تک چتین دوغار آنالار

زیروه لرده چیخدی ندیر منالار

فردوسی لار شیشه اولوب سینالار

عرشیلره ده دیرماشدی شهریار

تامام سرحدلری آشدی شهریار

 

چوخ شاعیرلریله گلدی اوز اوزه

غمله کدرله اوتوردو دیز-دیزه

گؤزلوک ووردو یاشی قورویان گؤزه

شعیرلریله اولاشدی شهریار

تامام سرحدلری آشدی شهریار

 

*******

شاعر : ابوالفضل کریمی ( آتا به ی)

 

 

              دان اولدوزو

                 *************

سحره قدر گویلریمده دان گزر

 

ایشیقیندان بوتار دونیامی بزر

 

من باشقا دیللردن قیلمیشام حذر

 

داماریمدان آخان قیزیل قان کیمی

 

آنا دیلیم سئودیم سنی جان کیمین

 

 

وار سنده وارلیقیم ابدیّتیم

 

دیلیمدیر اولماقیم ابدیتیم

 

منه شهرت اولان بو هویتیم

 

گوز یاشیمدی اورگیمده قان کیمی

 

داماریمدان آخان قیزیل قان کیمی

 

 

آتام آنام آد آچیبلار دیلیمده

 

باش اوجا دولانیبلار ائلیمده

 

کسگین قلملری منیم الیمده

 

یاشاییرام خان اوغلو خاقان کیمی

 

آنا دیلیم سئودیم سنی جان کیمی

 

 

آنامین سودویله دولدون جانیما

 

 

قاریشیبسان ایلیگیمه قانیما

 

سپر داش اولدون دقیقمه آنیما

 

قبول ایله جانیمی قوربان کیمی

 

آنا دیلیم سئودیم سنی جان کیمی

 

آنا دیلیم سئودیم سنی جان کیمی

 

 

آنا دیلیم یامان داردا قالیبدیر

 

سئون لرین یامان درده سالیبدیر

 

منلیگیمی دوشمان مندن آلیبدیر

 

سئوگیلیله،سئودالی چاتان کیمی

 

آنا دیلیم سئودیم سنی جان کیمی

 

 

هله ده داماردا وار قیرتلی قان

 

اورکلر   سسلیر   آذربایجان

 

ال بیر اولسون دنیزیم وئرمسین جان

 

دنیزیم کوکره سین بیر عومان کیمی

 

آنا دیلیم سئودیم سنی جان کیمی

 

 

شهیدلرین قبرین اوسته آغلارام

 

یاغی لرین اللرینی باغلارام

 

وطنین یولوندا کونول داغلارام

 

کرکوکومو قایطار بیر سلطان کیمی

 

آنا دیلیم سئودیم سنی جان کیمی

 

 

آنا دیلیم اورگیمین بندیسن

 

آغزیمین شکریسن قندیسن

 

منجه بوتون دیللرین آفندیسن

 

تاریخین یازیلیب بیر طوفان کیمی

 

آنا دیلیم سئودیم سنی جان کیمی

 

 

آنا دیلی اینسانا بیر گرکدیر

 

اونالا دیل آچماخدا آرزی دیلکدیر

 

آنا دیلی یوردی،دوزدی، کومکدی

 

پیغمبر سوزو بیزه قرآن کیمی

 

آنا دیلیم سئودیم سنی جان کیمی

 

 

آنا دیلیم آی اللاهین آیتی

 

خالقیمیزا تانرینین عنایتی

 

تانری قویوب بوینوموزا میننتی

 

دیلیم اولوب دینیله ایمان کیمی

 

آنا دیلیم سئودیم سنی جان کیمی

 

*****

شاعر  ابوالفضل کریمی ( آتا به ی )

 

               حاجیلار 

                *********

 

یاز قلمیم سن یئنیدن حکایت

 

حاجیلاردان ائیلگینن شیکایت

 

بو حاجیلار هئچ مکه دن دویمادی

 

گئچنکی حاجیلار عیبرت قویمادی

 

ییرمی( 20)میلیونا مکه سی آلینی 

 

گئدیر گئتیرسین اوردان اعمالینی

 

مکه مدینه دای اولوب بهانه 

 

ایستیری شهرتین سالا جهانه

 

70یاشیندا باخ اونون ذوقونا

 

ایندی هله دوشوب مکه شوقونا

 

جوانلیقین گئچیردیب میخانه ده

 

توکوب شراب ایچیبدی پیمانه ده 

 

ایندی ایستیر اوز جانینی یاغلاسین

 

آللهینان عهدو پیمان باغلاسین

 

گئدیر حجه تا اورءگی سئوینه

 

تزه ال تاپیب آللهین ائوینه

 

چوخداندیر چالیشیر قاندالی قیرسین

 

گئدیب اوردا اللهی دءوری ورسین

 

اوخوماییب قراندان هئچ بیر آیه

 

بیلمیبدی آجدیر، توخدور همسایه

 

هاردا واردیر بوندان گونو قالینی

 

دوشونمه ییب همسایانین حالینی

 

نسیه آلیر آذوقه سین دکه دن

 

حاجی قارداش نه تاپیبسیز مکه دن؟؟ 

 

گئددین اوردا دولدوراسان تورباوی

 

یئددی میلیون گورمییئجک شورباوی

 

فیکر الئمه بهشت ساغدا سولدادی

 

مکه آختارسان سن اگر بوردادی

 

دده وئرنمیر قیز جهیزیه سین

 

ساتیری بورونده کی کلیه سین

 

مینلر دفعه عرشیدن فرشه أنیر

 

تاپیلمیر سفراسیندا بیر قاش پنیر

 

کاسیبچیلیق دردین سینه ده دریر

 

یوخسولوقدان قاپیدان ائلچی قئتریر

 

بو گوناهه حضرت علی قاضیدی

 

بوجور حجه آللهدا ناراضیدی

 

محشر گونی............... آساجیق

 

لوت جانووی داغ قازانا باساجیق

 

گونی گوندن آرتاجاقدی عذابین

 

قیامتده واردی بونا جوابین؟ 

 

نئینیریک دولتی نئنیریک واری 

 

نئنیریک یاغیشی نیینیریک قاری 

 

چوخالیب کوچه ده قاش آتان بیزه 

 

اءوزه توپرجکله یاش آتان بیزه

 

دونیانین مالینا باشییوی قاتدین 

 

شیطان اولوب شیطانه سن داش 

 

شیطان اوزی بو ایشه حیران اولور 

 

هر یئتیشن صاحیب ایمان اولور 

 

ئدیردیسن قوناقلارا مال أتی

 

گوروشوا گله بیرگول بیر پتی؟؟ 

 

ائیلشه بویرونده سنین خان باجی

 

مجلیسه گیرنده دییَلَر حاجی؟؟ 

 

قربان گونی آلما بی گوناه جانی

 

قاپی قاباقینده کسمه حیوانی

 

گوتورگونن باشیندا کی آغ تاجی

 

بللی دئیل حاجیلارین آماجی 

 

گئددین اوردا تاپانمادین آللهی

 

حالیوا یئر گوی آغلاییر واللهی

 

قورخوسوندان چولده آتلار کیشنئدی

 

عرب بیزیم قانیمیزا تئشنه دی

 

حق دانیشدیم سوزلریم اولدو آجی

 

بویور گوروم ندیر بونون علاجی 

 

ایستمیرسن جوان ایچیپ کفلئنه

 

مکه پولون وئر اونا تا ائولنه 

 

یوخسولارین کسدیلر یارانه سین

 

دولدورمایبن عربین خزانه سین 

 

ارزیش وئرسن گر فرهنگ و ادبه

 

مفته پولی  دئرمسن کی عربه

 

دیلسیز آغیزسیز پولو توکمه اوجونا

 

خائن  آدین قویما اوستوا قونا

 

مکه ده ایندی آختاریرسان نَئیی؟؟ 

 

حالدان حالا سالما بو آتا بَیی

 

غونچا گوللر پایلاشدیق گونسوز آیسیز

 

شهیدلر وئرمیشیک وطنه سایسیز 

 

بیلمدین فرقین یونجئینان چمنین

 

ییخدیلار  ائوین  مردم  یمَنین

 

سوریه ده شهیدلری یاد ائله

 

چالیشگینان ایرانی آباد ائله

 

یامان گوزلر دئیمسین بو وجوده

 

لعنت ائدسین الله آل صعوده

 

*******

#شاعر  ابوالفضل کریمی ( آتا به ی )

 

             انتظار 

         ********

ازل گوندن چوخ آغیر اؤلدو داشیم

بیلن یوخ نه چکیب بلالی باشیم

جان دوشمانیم اؤلدو اؤز یار یولداشیم

دورو سولاریم له تک بیلاندی یار

اؤزون گئددین انتظارین قالدی یار 

 

سیندیریبسان اؤرگیمین شوشه سین

جالاییبسان  ایچینده کی نئشه سین

اللرینه ساغلیق اؤلسون - یاشاسین

کئچن کئچدی اولانلاردا اولدو  : یار

اوزون گئتددين اينتيظارين قالدى يار

 

سن گئده لی گونوم قارادیر اینان

کونول حسرتیندن یارادیر اینان

قاییت کی قوجاغین چارادیر اینان

گولوشلرین پتک پتک بالدی یار

اؤزون گئددین انتظارین قالدی یار 

 

یاشلی گؤزلریم پایین اولدو سنین

شاختا بورانلار یایین اولدو سنین

حسرت یوکو لای لایین اولدو سنین

عشقین باشی داشدان داشا چالدی یار

اؤزون گئددین انتظارین قالدی یار 

 

گئجه گونوز دویونجا چوخ آغلادیم

سینمده    محببتیوی    چاغلادیم 

بوجور گلیب عشقوه دیل باغلادیم

نئدن اولوب گول رنگون سارالدی یار

اٶزون گئتدين اينتيظارين قالدى يار

 

تهجه اومیدیم سنیدون جهاندا

محببتیله  گوز  آچیب   باخاندا

خومار باخیش یاندیراندا یاخاندا

حسرتیمیز   اورکدن    آزالدی   یار

اٶزون گئتدين اينتيظارين قالدى يار

 

****

شاعر ابوالفضل کریمی ( آتا به ی )

 

                سلام  آنا

 

                    *********

گؤر نه حالدا قبرین اؤسده گلمیشم

دور آیاغا ، باخ  گؤر کیم  گلیبدیر

نه اؤلاردی  منده  سندن بیرله شم

دور آیاغا  باخ  گؤر  کیم  گلیبدیر

 

باخ گؤر سنه،  نه  گؤزل گول درمیشم 

خسته جانی قبرین اوستده سرمیشم

چوخ زاماندیر سنی الدن وئرمیشم

دور  آیاغا  باخ  گؤر  کیم  گلیبدیر

 

کاشجا  الله،  اؤلمک چین  منی  سئچه 

من سنسیزم، دئنن گؤروم سن نئجه

سن بیل الله گیر  یوخوما  بیر  گئجه

دور  آیاغا،  باخ  گؤر  کیم  گلیبدیر

 

یاندیریب  قلبیمی  اؤزگه  باخیشلار

 باشیم اؤستده یاغیر غملی یاغیشلار

تانریم   اؤزو  منی  سنه  باغیشلار

دور  آیاغا  باخ  گؤر  کیم  گلیبدیر

 

سن گئدندن  گؤز یاشیمی سیلمه دیم

اولان زامان قدریوی هئچ بیلمه دیم

نئجه سنین یئریوه من اؤلمه دیم

دور آیاغا ، باخ گؤر کیم  گلیبدیر

 

سئومه ییرم سندن باشقا کیمسه نی

تاپا  بیلمه ییرم دونیادا   سنی

اؤز  یانینا  آنا  گل   آپار   منی

دور آیاغا، باخ گؤر کیم گلیبدیر 

 

*****

شاعیر : ابوالفضل کریمی ( آتا به ی )

 

 

من اولندن سونرا

باسدیرین توپراغا

وطن بایراغا

قویون قوجاقلیم 

اوپوم دویونجا

توکولسون گؤز یاشیم 

باشدان بویونجا

دؤزدی چاتانمادیم 

گؤیده کی آی اولدوزا

چاتدیرین منی 

بایراغدا کی آی اولدوزا

بلکی منی باغیشلاسین 

آنا یوردوم آزربایجان 

آلسین منی اؤز قوینونا 

قوجاقلاسین  قوجاقلاسین

***

#شاعر ابوالفضل کریمی ( آتا به ی )

 

                 سئوگیسیز دونیا 

                              **********

 

سئوگیـــسیز دونیانین یؤخدی فایداسی

سئویلمـکدی اینسانلیقین قایداسی

وطن اوچون اوره ییمین بایداسی

سئوگی دن دؤلودور :  سؤیداشیم منیم

 آخسادا قوی آخسین گؤز یاشیم منیم 

 

چوخ چکمیشم  بو فلگین داغلارین

چوخ قارا گونلرده قویوب آغ لارین

سولدوروب دور یاشیل اورمان , باغلارین

چیمره له نیب گؤز اوسته قاشیم منیم

آخسادا قوی آخسین گؤز یاشیم منیم 

 

ایستکلریم منی مندن آلدیلار

اوزون خطرلی یوللارا سالدیلار 

آرزیلاریم یوخلوقلارا دالدیلار

منی محو ائیله دی نقاشیم منیم

آخسادا قوی آخسین گؤز یاشیم منیم 

 

نه قَـــدَر آه چکیـم نـه قَـــدَر قوسوم

نه قَــدَر لال اۏلوم نه قَـــدَر سۏسوم

آه کیمدن اینجیییم کیملردن کوسوم

نیفــرته چئوریلیب آخ کاشیم منیم

آخسادا قوی آخسین گؤز یاشیم منیم 

 

دردین گونشی یم قمی ساچارام

گؤز یاشیملا هر باغلی نی آچارام

سئوگی یوخوسوندا چابک قاچارام

یئهین دن یئهین دیر یاواشیم منیم

آخسادا قوی آخسین گؤز یاشیم 

 

دوست نقدر آرتیق اولا دویمارام

چالیشارام آرتیرارام سویومارام

دولومسونا،کدرله نه قویمارام

گؤرمه ییم آغلاسین یولداشیم منیم

آخسادا قوی آخسین گؤز یاشیم منیم 

 

فلــک دۏلانــدیـریب بـوتون فصیلی

یاییمیز قیش اولوب یوخسا اصیلی

باغیــن خـزان ائـدیب بوتون نسیلی

هئچــه پوچـا گئتــدی تلاشیم منیم

آخسادا قوی آخسین گؤز یاشیم منیم 

 

*****************

#شاعر  ابوالفضل کریمی ( آتا به ی )

 

 

                 ساباحیم

                     ********

ایکی گوندور گؤزومدن  یاش چکیلمیر

ساباحیما  نه یازیلیب؟ آی  آلله!

من بیله سی  اودا  درددیر, اودا قم!

 یارانان دان  گولدویومجه چکدیم  آه!

 ساباحیما  نه یازیلیب  آی  آلله!

 

تورپاق  اوتدو  اولوموزو  بیر  آندا

داشا   دوتدو  یولوموزو  بیر آندا

قوینا   قویدو   قولوموزو  بیر آندا

کؤلگه  سالدی  روحوموزا  اینتباه!

 بس ساباحا  نه یازیلیب؟ آی آلله!

 

 ها چیرپیناق! یول  اوچوشا  باغلیدیر.

گونئی, قوزئی  قوشا-قوشا باغلیدیر.

اوز گولوشه , ال  آلقیشا  باغلیدیر.

یاخامیزدا،" یاشام" آددا  بیر گوناه!!

 بس  ساباحا  نه یازیلیب؟ آی آلله!

 

******************

شاعر :  ابوالفضل کریمی ( آتا به ی )

 

 

               الخلج

          *************

بو اولکه نین هریئرینده دولاندیم

وطن کلمه سینه دویوب ایناندیم

اوز دوغمایوردوما گلیب دایاندیم 

قوربان اولوم سنه آزربایجانیم 

الخلج دیر منیم شهرتیم شانیم 

 

یاخشی صفالیدیر گوزل وطندیر

هرطرفی گول چیچکدی چمندیر

داغلاری گزملی  دشت و  دمندیر

وطنده واردیر هم باغیم بوستانیم

الخلج دیر منیم شهرتیم شانیم 

 

دوم دورو بولاقلار چمندن آخیر

بولودلار آغلاییر شیمشه یین چاخیر

کهلیک لر بویلانیر قایادان باخیر

اجدادیمدان سنده چوخدور نیشانیم

الخلج دیر منیم شهرتیم  شانیم

 

عشقینله یاشارام، هرزاماندا من

آدینی سس له رم تار کاماندا من

دؤزمه رم گؤزوندن،یاش داماندا من

"آتا به یم "، یوخدور باشقا مکانیم

الخلج دیر منیم شهرتیم شانیم 

 

********************

شاعر : ابوالفضل کریمی (آتا به ی)